(maie).

mi chiammo rusinella,
ma 'a ggente ca vene ccà,
abbascio 'o campusanto
d'e funtanelle,

me cunosce comme
'a capuzzella d’e llacreme.

e, quanno ‘o diceno zittu zitto,
rideno sotto ‘e baffe, ma i’
me i’ sento tutto chello ca diceno.

i’ songo ‘a piccerella ca nun è
crisciuta maie;

i’ songo ‘a lucella
dint'a ll’oscurità d’a notte
tra ‘o cielo e 'o mare,
quanno ‘e stelle so’ tutte
quante criature zenniarelle,
(bambine che si fanno i segni).

e (maie),
arricurdatavella,
è na parola ‘e carcere.


e stu mare,
cchiù animale
‘e mille uommene,

scuntruso,
sbatte contro 'e pprete 'e tufo
d'o castiello aragonese
e 'o palazzo d'e spiritilli
‘e vascio ‘o puorto,

(maie...)

e,
nisciuno, nisciuno,

‘a quanno so' nnata
fino a morte

m'è venuta a truvà

(maie)

i' ca songo ‘a capuzzella
tra osse cchiù grosse.
e, pe stu fattariello,
spisso,
chiagn’(piango)

nun solo
internamente,
ca ‘e viscere s’arrevotano,
ma ,
chiagnenno nientedimeno,
'e llacreme.

è comme si dicessero
ca ‘a capuzzella mia
fa ‘o miracolo,

sarebbe a dicere
ca votta lacreme ‘e sanghe
comm’a statue d’e maronne.

no, no, no nun me facite
annummenà a chella mamma santa

‘o saccio ca nun ce credite.
facite bbuono.
pur'i' nun ce credesse.

‘a quanno ‘o munno è munno
'e muorte nun chiagneno.

e tantomeno 'a capa 'e morte
e ll'ussarella 'e 'na criatura.

(maie)

e llacreme me nfonneno
(mi bagnano)
chelle ca na vota erano
labbre 'e freva,
nasillo ca scurreva,
vucchella 'e cerasa,
'e dentille 'e canella

abbandunata dint'o vico.

(maie)


e, se nfunnevo pure 'o mantesino

pecchè,
ll'unica vestecciolla mia,
era chillu mantesino.

e, nzieme,
i' e isso,
ce simmo fatto
vierno e ‘a staggiona,
ma pure quanno 'e sciure
spuntavano
azzeccate 'e tubature d’e canale
'e scole.

(maie)

i' songo rusella,
rosa nun 'o saccio
e, margheretella nemmeno

(maie)

nun aggio saputo
nè tantomeno
quaccuno m'è venuta a truvà

dinto e sotto a povere e ‘sti pprete

(maie)
aggio saputo,
‘uardate nfacce,
vulute bbene e,
malericiute

chi songo state
mammema,
patemo
'e frate e 'e ssore mie?

‘e vase me songo rimaste
nganna,(in gola) appise ‘o core.

e chi sa,
si tutte quante lloro
me vulevano bbene,
chillu bbene piccirillo
ma granne accussì.

e pe' stu dulore,
st’ummerità dinto a ll’ossa,
ca nun passa maie,
mo ca songo na capuzzella,

vuje,
sicuramente,
nun me credite,
e,
facite bbuono…

ma ‘a dinto ‘e fussetelle
d’a capa ‘e morte,
chelle ca na vota erano
ll'uocchie mieie

scorrano 'e llacreme,
‘e llacreme

'e nu bbene ca maie
aggio afferrato.

(maie maie maie).

e,
(maie)…
arricurdatavella,
è na parola ‘e carcerazione.

e stu core oramaie pòvere.

Scarpanibus.
Ciao.